NAIBU WAZIRI MABULA AZITAKA OFISI ZA HALMASHAURI NA WILAYA NCHINI KUZITUMIA OFISI ZA ARDHI ZA MIKOA

Na Munir Shemweta, WANMM KILIMANJARO

Naibu Waziri wa Ardhi Nyumba na Maendeleo ya Makazi Dkt Angeline Mabula amelipongeza Shirika la Nyumba la Taifa (NHC) kwa kuweza kukamilisha ujenzi wa miradi ya jengo la ofisi ya Mkuu wa wilaya ya Hai lililopo Bomang’ombe na ofisi pamoja na nyumba za Watumishi wa Wakala wa huduma za Misitu (TFS ) zilizopo kwenye shamba la Miti la Kilimanjaro Kaskazini maarufu Rongai wilayani Rombo mkoani Kilimanjaro.

Dkt Mabula alitoa pongezi hizo jana alipotembelea miradi ya ujenzi wa majengo ya ofisi na nyumba hizo akiwa katika ziara ya kukagua utekelezaji wa miradi inayotekelezwa na Shirika la Nyumba la Taifa pamoja na kukagua utendaji kazi wa sekta ya ardhi kwenye mkoa wa Kilimanjaro.

Taswira ya Jengo la Ofisi ya Mkuu wa Wilaya ya Hai mkoa wa Kilimanjaro (PICHA ZOTE NA WIZARA YA ARDHI)

Alisema, Shirika la Nyumba la Taifa kwa sasa linapaswa kupongezwa kutokana na juhudi kubwa inayofanya katika kutekeleza miradi yake ya ujenzi wa majengo ya ofisi na nyumba katika maeneo  mbalimbali nchini ikiwemo ofisi ya Mkuu wa wilaya ya Hai na zile za Wakala wa Huduma za Misitu (TFS) ambapo alieleza kuwa ofisi hizo zimejemgwa katika viwango vinavyotakiwa.

Naibu Waziri Mabula alisema, hivi sasa NHC imeaminiwa na Serikali kwa kupatiwa miradi mbalimbali ya ujenzi ikiwemo ujenzi wa majengo ya ofisi na nyumba za Wakala wa huduma za Misitu Tanzania (TFS) nchi nzima sambamba na ujenzi wa hospitali za Rufaa za mikoa ya Mara na Mtwara.

‘’Tunapaswa kumshukuru Rais John Pombe Magufuli kwa kuamua kutoa fedha za ujenzi wa majengo ya ofisi na nyumba za Wakala wa huduma za Misitu kwenye mikoa mbalimbali, Raisi anataka watumishi wafanye kazi katika mazingira mazuri’’ alisema Dkt Mabula.

Naibu Waziri wa Ardhi Nyumba na Maendeleo ya Makazi Dkt Angeline Mabula akitoka kukagua jengo la ofisi ya Mkuu wa Wilaya ya Hai mkoa wa Kilimanjaro wakati wa ziara yake ya kukagua miradi ya ujenzi inayofanywa na Shirika la Nyumba la Taifa kwenye mkoa wa Kilimanjaro. Kushoto kwa Naibu Waziri ni Mhandisi wa ujenzi wa mradi huo Peter Mwaisabula.

Kwa mujibu wa Naibu Waziri, Shirika hilo la Nyumba la Taifa kwa sasa imeaminiwa na serikali hivyo linapaswa kuhakikisha miradi yote inayokabidhiwa inakamilika kwa wakati sambamba na ujenzi wake kukidhi viwango na ubora unaotakiwa ili kujenga imani kwa wananchi na serikali kwa ujumla.

Akielezea utekelezaji wa mradi wa ujenzi wa jengo la Ofisi na nyumba za watumishi wa Wakala wa Huduma za Misitu Tanzania, Meneja wa Shirika la Nyumba la Taifa mkoa wa Kilimanjaro Juma Kiaramba alisema mradi huo ambao mpaka sasa umetumia TZSh 639,494,580.18 ulianza Septemba mwaka jana na tayari kazi za ndani kwa majengo yote 4 umekamilika kwa asilimia mia moja na kusisitiza kuwa Shirika lake linatarajia kukamilisha zilizobaki za nje katika kipindi cha muda mfupi ujao.

Kwa upande wake Kaimu Meneja wa Shamba la Miti la Kilimanjaro Kaskazini Joel Naasi  alimueleza Naibu Waziri Mabula kuwa TFS kupitia shamba la Miti la Kilimanjaro Kaskazini Wakala umefanikiwa kukusanya maduhuli kiasi cha fedha 3,688,849,489.68 hadi kufikia Mei mwaka huu wa fedha.

Naibu Waziri wa Ardhi Nyumba na Maendeleo ya Makazi akizungumza alipotembelea mradi wa ujenzi wa jengo la Ofisi ya Wakala wa Huduma za Misitu (TFS) katika shamba la Miti la Kilimanjaro Kaskazini lililopo wilayani Rombo mkoani Kilimanjaro,

Katika hatua nyingine Naibu Waziri wa Ardhi Nyumba na Maendeleo ya Makazi Dkt Angeline Mabula amezitaka ofisi za halmashauri na wilaya nchini kuzitumia ofisi za ardhi za mikoa zilizoanzishwa hivi karibuni katika kushughulikia masuala ya ardhi ili kuleta ufanisi katika sekta ya ardhi.

Akizungumza na Watendaji wa sekta ya ardhi wa ofisi ya ardhi mkoa wa Arusha pamoja na wale wa halmashauri za mkoa huo ikiwemo jiji la Arusha, Dkt Mabula alisema uamuzi wa kuanzisha ofsi za ardhi za mikoa ni kutaka kuondoa kero za ardhi sambamba na kusogeza huduma za sekta hiyo karibu na wananchi.

Alisema, ofisi za wilaya na halmashauri katika mikoa zinapaswa kuwatumia wataalamu waliopo ofisi za ardhi za mikoa katika kushughulikia masuala ya upimaji, uthamini na mipango miji ili kuwa na miji iliyopangika na wakati huo wananchi kumilikishwa maeneo yao.

Akielezea suala la upungufu wa watumishi wa sekta ya ardhi kwa baadhi ya halmashauri, Naibu Waziri Mabula alisema kwa sasa wizara yake iko katika mchakato wa kuwapanga upya watumishi wa sekta hiyo baada ya kukamilika zoezi la kupeleka watumishi wa ofisi za ardhi za katika ofisi za mikoa.  

Unaweza kuangalia pia

SERIKALI YATOA BILIONI 3 KULIPA WATUMISHI WA AFYA WALIOSHIRIKI MAPAMBANO DHIDI YA UVIKO-19

Na WAMJW – Kibaha, PWANI.Serikali ya Awamu ya Sita chini ya Rais Mhe Samia Suluhu …

Leave a Reply

Your email address will not be published. Required fields are marked *

This site uses Akismet to reduce spam. Learn how your comment data is processed.